Fërgesë me speca për të lëpirë gishtat

Kjo recetë u përgatit nga Maison de goût

Përbërësit: 5 speca jeshilë, 3 speca të kuq, 1/2 kokërr qepë, 2-3 thelpinj hudhra, 4-5 domate, 1 lugë gjelle salcë domatesh, 1 kokërr vezë, 250 g djathë deleje ose gjizë, vaj ulliri dhe majdanoz i freskët.

Përgatitja: Lajmë fillimisht specat dhe pasi i fshijmë mirë e mirë ju heqim farat dhe i presim në rrathë me madhësi mesatare. Në një tigan të thellë shtojmë vaj ulliri dhe skuqim specat në zjarr të ulët. Pasi specat janë skuqur pak, shtojmë qepën e prerë dhe hudhrat e prera imët. Vendosim kapakun e i lëmë të skuqen ngadalë. Në fund shtojmë domatet e pastruara nga lëkura dhe të grirë në rende dhe salcën. E përziejmë mirë dhe shtojmë fare pak kripë që të mos ndihet aciditeti i domates. Shtojmë djathin e thërrmuar ose gjizën dhe i lëmë të shkrijnë me njëra tjetrën e të bëhen kompakte. Në fund e largojmë tiganin nga zjarri dhe shtojmë vezën duke e përzier shpejt në mënyrë që veza mos të pritet direkt. E vendosim përsëri në zjarr edhe për 2-3 minuta të tjera dhe shtojmë majdanoz të freskët sipas dëshirës. Ju bëftë mirë!