Ku të kalojmë orët e lira!

Një shprehje thotë se për festat e fundvitit, të gjitha rrugët të çojnë në shtëpi! Por, atmosfera që ka marrë kryeqyteti këto ditë është e duhura për të qëndruar jashtë mureve të shtëpisë.

Rruga pedonale në qendër të Tiranës, është ndër ambientet më të frekuentuara për këdo që jo vetëm gjatë orëve të pasdites, por edhe atyre të paradites dëshiron të bëjnë pazarin e aksesorëve festiv e të pijë diçka jashtë ambienteve të mbyllura të lokaleve. Pas “Pedonales”, pema e madhe e Vitit të Ri, në qendër të Tiranës është një tjetër zonë e preferuar nga të gjitha grupmoshat, e bashkë me të, pak më sipër edhe pista e improvizuar e patinazhit. Por, qendrat tregtare në këto ditë festash janë gjithashtu një alternativë mjaft e zgjedhur për orët e lira, sidomos nga familjarët. Ndaj nëse shpirtin festiv nuk e keni në zemër gjatë këtyre ditëve, atëherë mos prisni as dhurata nën pemë!