Showbiz 19 Maj 2022

"Nuk po m'lanë as me vdekë!" shuplaka e fortë e Çun Lajçit për të gjithë katranët e tastierës

Showbiz

 

Etja për klikime, për të publikuar të parët apo për të pasur ekskluzivitetin e një ngjarjeje të minutës së fundit ka bërë shpeshherë që portalet të bien në grackën e “fake news” dhe të arrijnë deri në atë pikë sa të “vdesin” njerëzit për së gjalli dhe rasti më i fundit është ai i kolosit të skenës, Çun Lajçi. Ditët e fundit në rrjete sociale ka qarkulluar një foto ai ku shihet i shtrirë në një varr dhe kaq ka mjaftuar që disa pseudomedie, të cilat nuk marrim mundimin të verifikojnë lajmin, ta shpallin të vdekur.  

Lajçi thotë se kjo është realizuar katër vite më parë si skenë e një filmi me regjisoren e ndjerë, Arzana Kraja. Sipas tij fotoja është ripostuar që të shpërfaqin katranin e shpirtit ndaj artistit, e veprimtarisë së tij artistike e letrare.

Nuk po m'lanë as me vdekë!

E kam ndëgjua shumë herë ket fjalë, nga burra sojnik e gra fisnike, por isha i ri e nuk e tjerrsha ma shumë, ofshamën e tyne!
Nuk po m'lanë me vdekë, me emelet e mia. Hallet e mia po ua nxanë rrugët!
Ishin ankimet e renkimet me të cilat u rrita, pa e kërkua psehin!
Kur dola n'Prizren, me ba do shkollë, e kur e ndegjova nji hallë, tek i thoshte komshiut: "Aman, m'le të vdes me hallet e mia" thashë; nuk qenkemi vetëm ne katundarët, që na pengon smundja, fukarallaku, gazepi i tjetrit! Edhe sheherlitë qenkan si na!

Sa popull i "zgjuet" ky populli im! Sa "shpirtbardhë"! Mbase populli ma dorëliri për shamje, ofendime e mallkime. Sa shumë rrugaçi, në nji popull t'vogël, tha At Zef Pllumi!

Dhe e shfrytëzova rastin, teksa po xhironim film me regjisorën, (tani të ndjerë), Arzana Krajën. Po e lueja nji plak, të cilit ia kishin vra familjen Milicia serbe, e nga dëshpërimi, ia hapte vetës varrin, por natën ia mbulonte nusja e djalit, e cila kishte shpëtua me plakun!
I thashë Arzanës, me lejen tande po e postoj ket foto ne Facebook, me nji fjali: Me tregoni kujt i mbet Çakorri e ku mbet vorri im? Po e baj protesten time, me ket skenë filmi, i thashë! Sepse ishte viti i protestave për Kullë e Çakorr, e n'ato protesta, (si rugovas) isha i përfshimë edhe unë!
Tani, mbas 4 vitësh, "zemër bardhët" "dashamirët", analfabetët, "atdhetarët" e kanë ripostu foton, por pa fjalinë time t'kohes, që ta shpërfaqin katranin e shpirtit, ndaj artistit, e veprimtarisë tij artistike e letrare. Hej! U pengon dalja ime rrugëve me librat e mi! U pengon qëndresa ime?! Mos përkulja, mos dorëzimi, mos shitja te asnjena parti, jo tash, por që 22 vite!
Thashë: Kjo s'do të ndodhte sikur t'isha të Ramushi! Të Albini, të Memli! Jo, s'do të ndodhte, sepse jemi populli frikacak e do tu frigoheshin edhe hijeve të tyne, e s'do t'me shanin!
Ne e duem gurin! E duem zjarrmin! E duem mjegullen!
E urrejmë diellin, ujin e dheun! Mjerë ne për zemrat që i kemi!
Mjafton ti lexoni komentet të kjo foto (nëpër portale) e të bindeni ne këtë që ua thashë!
Me thirren televizionet e Shqipnisë për sqarim, sepse jemi të tmeruem nga këto shkrime, për nji kalibër artisti, m'thanë!
Lereni të shfryhen "zemërbardhët", se jemi popull që s'lexojmë ma shumë, se ç'flet nji fotografi, iu thashë!
Na pengon gjama, ofshama, vdekja e tjetrit, ndaj vërsulemi si hijenat me i hangër edhe t'vjellat tona! Le të shfryhen me shamje sa jam gjallë, që ta di, se, cili ishte populli im, për t'cilin bana art!
Popull, që s'e don të vërtetën! Popull që ushqehet me rrenën! Ky jemi ne!
Ja ku e keni foton e 2017-tës, ndaj shajeni fytyrën tuej, se timen e ka krujua Zoti!
Maj, 2022

ARTIKUJ TE NGJASHEM

  • Javor
  • Mujor
  • Vjetor