Harrojini nuancat e mërzitshme të tokës, sipas stilistëve ngjyra lejla është gjithçka që ju duhet për sezonin e vjeshtës

Ditët e ngrohta të fillimit të tetorit na bënë të besojmë se verës nuk i kishte ardhur fundi akoma, por ashtu si çdo ëndërr e bukur zgjatën fare pak dhe tanimë jemi zyrtarisht nën pushtetin e vjeshtës. Mirëpo sezoni i ri nënkupton edhe gardërobë e re, ndaj nëse nuk keni bërë ende blerjet e reja për këtë stinë, ky artikull do t'ju vijë në ndihmë.

Keni kohë që doni të dilni për shopping, por jeni ende të paqarta se ç'të zgjidhni? Para së gjithash, na lejoni t'ju themi se propozimet për vjeshtën e sivjetme janë larg ngjyrave të mërzitshme të tokës, përkundrazi stilistët kanë guxuar duke sjellë në koleksionet e reja nuancat magnetike dhe instensive të lejlasë.

Një ngjyrë që tashmë ka magjepsur të gjithë influencueset dhe blogeret, duke u shndërruar kësisoj në protagonisten kryesore të street style-it. Gjithmonë perfekte në kombinim me ngjyra neutrale si e zeza dhe e bardha, ato ju sugjerojnë gjithashtu ta kombinoni me blunë elektrike, mustardën, të kuqen, apo jeshilen e ndezur për një look shumë më të guximshëm.