Vjosa u shpall Park Kombëtar, reagon Leonardo Di Caprio: "Le ta shijojnë brezat e ardhshëm"

Ylli i njohur i Hollivudit, Leonardo DiCaprio e ka konsideruar historike shpalljen e lumit Vjosa një Park Kombëtar. Në një postim në Instagram, DiCaprio shkruan se tashmë lumi Vjosa do të rrjedhë i lirë përgjithmonë, nga burimi në det, për ta shijuar brezat e ardhshëm. Aktori shton se ky është një vizion i ri për ruajtjen globale të ujit dhe përgëzon bashkëpunimin mes qeverisë shqipare e shoqërisë civile.

Postimi:

Sot është shkruar historia. Bashkëpunimi mes qeverisë shqiptare, shoqërisë civile dhe biznesit dhe ka krijuar Parkun e parë Kombëtar të Lumit të Egër në Evropë. Lumi Vjosa do të rrjedhë i lirë përgjithmonë, nga burimi në det, për ta shijuar brezat e ardhshëm. Një vizion i ri për ruajtjen globale të ujit është këtu. Urime për të gjithë ata që e bënë realitet këtë përpjekje të mahnitshme!

DiCaprio ka bërë shumë herë thirrje për mbrojtjen e lumit Vjosë. Ai ka takuar edhe Kryeministrin e Shqipërisë, Edi Rama në Samitin COP-26 për klimën, ku biseduan në lidhje me mbrojtjen e lumit Vjosë.