Të thjeshta dhe të shijshme, si të përgatisni kotoleta milaneze sa hap e mbyll sytë

Kjo recetë u përgatit nga Unëgatuaj.com

Për një version më të lehtë, për skuqje mund të përdoret gjysmë vaj ulliri e gjysmë gjalpë dhe në fund kotoleta shoqërohet me lëng limoni të shtrydhur sipër. Ekzistojnë dy variante për përgatitjen e saj: mund të pregatitet me feta mishi të parrahura (në të cilat mishi qëndron i butë brenda) ose me feta mishi të rrahura e cila e bën me krokante. Një version tjetër i kotoletave, sidomos në ditët e nxehta, është t’i mbulosh ato me feta domate dhe gjethe rukola.

PËRBËRËSIT: 4 fileto viçi, 100 g miell, 100 g bukë e tharë e grirë (galetë), 2 vezë, vaj ulliri, gjalpë dhe kripë.

PËRGATITJA: Për realizimin e kësaj pjaterrahim fillimisht filetot e viçit me rrahësen e mishit për t'i bërë më të holla. Më pas rrahim vezët në një enë dhe shtojmë në të galetën duke i përzier mirë derisa të formohet një masë homogjene. Filetot i marinojmë me kripë dhe vaj ulliri, i kalojmë në miell dhe më pas në vezë dhe galetë. Shkrijmë gjalpin në tigan dhe i vendosim për t'u skuqur nga të dyja anët derisa të marrin ngjyrë të artë. I servirim kotoletat të ngrohta duke i shoqëruar me një racion patate furre ose të skuqura.