Është zyrtare, ky është vendi i parë në Shtetet e Bashkuara që ndalon përdorimin e "TikTok-ut" për të gjithë

Këtë të mërkurë, guvernatori i Montanës, Greg Gianforte ka nënshkruar projekt-ligjin i cili ndalon përdorimin “TikTok-ut”. Që muajin e kaluar, ligjvënësit në Dhomën e Përfaqësuesve me shumicë votash e miratuan projektligjin e njohur si SB419, duke e dërguar atë në tryezën e Gianforte-s. Ai dha deklaratën se po ndalon aplikacionin e preferuar të gjeneratës Z për të mbrojtur të dhënat personale të Montanës, duke u bërë kështu shteti i parë që ka marrë këtë hap në Shtetet e Bashkuara.

Gianforte u shpreh: “Partia Komuniste Kineze përdor “TikTok-un” për të spiunuar amerikanët, për të shkelur privatësinë e tyre dhe për të mbledhur informacione. Kjo gjë është e dokumentuar. Sot, Montana ndërmerr veprimin vendimtar për të mbrojtur të dhënat personale dhe informacionet sensitive nga Partia Komuniste Kineze."

Projekt-ligji, i cili pritet të hyjë në fuqi në janar të vitit që vjen, parashikon një gjobë prej 10,000 dollarësh në ditë për shkelësit, duke përfshirë edhe dyqanet e aplikacioneve. Brooke Oberwetter, një zëdhënës për “TikTok-un” ka dhënë gjithashtu një deklaratë publike për “CNN” ku shpjegoi se platforma do të vazhdojë të mbrojë të drejtat e përdoruesve të saj në këtë shtet.

“Guvernatori Gianforte ka nënshkruar një projekt-ligj që cenon të drejtat e Amendamentit të Parë të banorëve të Montanës duke ndaluar në mënyrë të paligjshme “TikTok-un”, një platformë që fuqizon qindra mijëra njerëz në të gjithë shtetin. Ne duam të sigurojmë banorët e Montanës se ata mund të vazhdojnë të përdorin këtë aplikacion për të shprehur mendimin e tyre, për ta përdorur si mjet për të jetuar dhe për t’u ndjerë pjesë e një komuniteti, ndërsa ne vazhdojmë të punojmë për të mbrojtur të drejtat e përdoruesve tanë brenda dhe jashtë Montanës."

Vendimi tërhoqi gjithashtu vëmendjen e Keegan Medranonga nga “American Civil Liberties Union” i cili u shpreh: “Me këtë ndalim, Guvernatori Gianforte po ndalon të drejtën e lirisë së fjalës së mijëra banorëve të Montanës që përdorin aplikacionin për t'u shprehur, për të mbledhur informacione dhe për të drejtuar bizneset e tyre. Ne kurrë nuk do t'i shkelim të drejtat e Amendamentit të Parë."

Këto masa vijnë pas lajmeve që qarkulluan se aplikacioni është në pronësi të kompanisë “ByteDance” me bazë në Kinë. Që nga marsi i këtij viti, “TikTok-u” ka kaluar një periudhë kaotike pasi është akuzuar se po përdor informacionet e përdoruesve me qëllim spiunazhin. Megjitatë deri tani nuk ka asnjë provë që qeveria kineze të ketë aksesuar ndonjëherë informacionet e shtetasve me bazë në SHBA. Për këtë problematikë asaj kohe shefi ekzekutiv i “TikTok-ut”, Shou Zi Chew doli përpara kongresit amerikan duke marrë në dorë frerët e kompanisë. CEO e quajti mbrojtjen e sigurisë dhe privatësisë së përdoruesve si një nga prioritetet kryesore të kompanisë dhe tha se të dhënat e përdoruesve amerikanë do të ruhen "në tokën amerikane, nga një kompani amerikane, e mbikëqyrur nga personeli amerikan". Ai gjithashtu deklaroi se TikTok do të sigurojë që "të mbetet një platformë për shprehje të lirë dhe se nuk mund të manipulohet nga asnjë qeveri".