"Simply the best", ndahet nga jeta në moshën 83-vjeçare legjenda Tina Turner

Është ndarë nga jeta në moshën 83-vjeçare këngëtarja e njohur amerikane, Tina Turner.  Sipas medieve ndërkombëtare, Turner ndërroi jetë pasi humbi betejën me një sëmundje nga e cila vuante prej kohësh.

“Tina Turner, mbretëresha e Rock 'n' Roll vdiq paqësisht këtë të mërkurë në moshën 83-vjeçare pas një sëmundjeje të gjatë. Ajo u shua në shtëpinë e saj, në Kusnacht pranë Zyrihut, në Zvicër. Me ikjen e saj, bota humb një legjendë të muzikës dhe një shembull model”, tha në një deklaratë një zëdhënës i këngëtares.

Sipas asaj që shkruan "The Guardian", Turner u diagnostikua me kancer në zorrë në vitin 2016, kurse në vitin 2017 bëri një transplant të veshkës, por duket se shëndeti i saj vijoi të përkeqësohej dita-ditës.

Ajo u bë fillimisht e famshme në vitet 1950 krah ish-bashkëshortit Ike Turner me këngët klasike si "River deep" apo "Mountain high", ku spikati falë talentit të saj të jashtëzakonshëm. Përveç aftësive vokale, Tina Turner u shndërrua edhe në një mbretëreshë të stilit. Kombinimet e minifundeve me ngjyra, xhaketa të lëkurës crop dhe stiletto-ve të larta u kthyen në trendin e viteve'80. Tina ka fituar 8 çmime Grammy nga 25 nominime.