Nëse mbrëmjen e djeshme nuk keni qënë të pranishëm në koncertin e Marsela Çibukaj në nder të javës italiane të kulturës, dijeni që keni humbur një spektakël shumë të bukur.

Kush është ndjekës i Living ka lexuar më patjetër dhe intervistën e saj kur ishte e pranishme në kopertinën e muajit shkurt 2023, në të cilën ajo shprehu edhe kënaqësinë  e të qenit ambasadore e kulturës italiane:

”Titulli si Ambasadore e Italisë mes dy kulturave, asaj shqiptare dhe italiane... E kishe menduar ndonjëherë?

Jo, nuk e kisha menduar. Ishte një surprizë shumë e bukur që ky titull m’u dorëzua nga Ambasadori Italian në Shqipëri, z. Fabrizio Bucci. Ndër vite jam munduar të jem vetvetja dhe të sjell në skenë për publikun, të gjithë formimin tim artistik, duke krijuar kështu një urë të fortë midis dy popujve, midis këtyre dy tokave fqinje të mrekullueshme, kaq të afërta gjeografikisht, historikisht dhe kulturalisht, siç janë Shqipëria e Italia.”

E pikërisht për t'i dhënë dhe shqiptarëve një pjesë të kulturës me të cilën ajo është rritur dhe ka ndikuar në Marselën që është sot, erdhi ky recital me repertorin e kantautorit dhe këngëtarit Fabrizio De André, në bashkëpunim me Ambasadën italiane, Ministinë e Kulturës dhe Bashkinë e Tiranës.

Përveç këngëve ajo ndau me publikun dhe historinë e saj që nga vajtja në Itali, njohja me mësuesen e muzikës e cila i dhuroi dhe kasetën e parë me këngë të De André.

Nuk mund të mungonte kurrsesi në skenë krah saj këngëtari dhe instrumentisti, Vitmar Basha, njëkohësisht dhe partneri i saj. Ai e shoqëroi duke kënduar këngën "Andrea".

Ky koncert u mbyll me një lajm që me siguri fansat e saj kanë kohë që e presin. Albumi i ri i Marselës është rrugës dhe do të lançohet me një koncert edhe më të bukur se ky që ishte mbrëmjen e djeshme.