Lira Gjika: "Vjehrra e vërtetë nuk ia thotë kurrë nuses së saj këto fjalë"

Nga Lira Gjika

Cili është roli i gjyshes? Të rrisë nipat dhe mbesat? Jo, ata duhet t’i rrisin prindërit e tyre. Gjyshja duhet të ndihmojë të rinjtë të përballojnë dhe të ndërtojnë rutinën e re të të jetuarit. Gjyshja e mirë vazhdon të jetë nënë për vajzën apo nusen, që sapo është bërë nënë. E inkurajon nënën e re që çdo gjë mund dhe duhet t’ia bëjë vetë fëmijës. Ajo e nxit dhe e siguron se është në rrugë të mbarë, sepse kështu i ka ndodhur edhe asaj.

Gjyshja e mirë nuk i thotë nënës së re, "Ti s’di dhe mund ta dëmtosh fëmijën. Meqenëse nuk di, do të përkujdesem unë". Kjo mënyrë është vetëm e dëmshme, si për fëmijën ashtu edhe për nënën e re.

Fëmija do të rritet nga nëna e tij sepse vetëm me atë, nënën, mund të ndërtojë atë lloj sigurie dhe besimi për jetën, që bën të mundur një jetë sa më pak problematike në të ardhmen.

Nëna e re do të humbasë kohën e çmuar, pasi fëmija nuk ka kohë të humbë kur vjen në këtë jetë. Duhet të ndërtojë marrëdhënien me nënën për të ndërtuar sigurinë e besimin, por nëna e re nuk është gati sepse është e trembur. Këtu duhet ndihma e gjyshes, të mos e lerë vetëm nënën e re dhe ta inkurajojë. Të nxisë babanë të jetë pjesë e rritjes së fëmijës së tij së bashku me gruan e tij, nënën e re. Kjo është detyra e gjyshes dhe jo të pretendojë rritjen e fëmijës.