Forumi për Zhvillimin e Medias, OSBE nderon me dy çmime "Faktoje"

 

Faktoje u nderua me dy çmime nga prezenca e OSBE-së në Tiranë, në ceremoninë e mbajtur për Forumin e IX vjetor për Zhvillimin e Medias.

Konkursi i sivjetshëm u përqendrua në verifikimin e fakteve dhe përdorimin e të dhënave nga burime të hapura, përkrahjen e gazetarisë së bazuar në fakte dhe promovimin e përdorimit të të dhënave me burim publik. Vlerësimi nga OSBE i Faktojes i jep zë gazetarisë cilësore dhe punës kërkimore të gazetarëve profesionistë duke i ofruar publikut informacion të plotë dhe transparent se sa të përgjegjshëm janë politikanët në mbajtjen e premtimeve që japin, sidomos në fushata elektorale.

Dy gazetaret e qendrës Faktoje u vlerësuan këtë javë me çmime në kuadër të konkursit për gazetarinë Fact checking. Çmimet u dhanë në një ceremoni që përmbylli forumin e përvitshëm për Zhvillimin e Medias, i cili sivjet pati temën “Udhërrëfyes për lirinë e medias: Krijimi i rrugës për më tepër mbrojtje të gazetarëve, pavarësi dhe integritet të medias”.

Gazetarja e Faktoje, Esmeralda Topi u vlerësua për shkrimin e saj: ‘By Pass-i i Vlorës, si u katandis investimi 56 mln euro për një vit’.

Nëpërmjet këtij artikulli tregohet me fakte se si kjo rrugë ishte amortizuar, vetëm një vit pas inaugurimit. Gjithashtu, By Pass-it të Vlorës i mungon sinjalistika, shtresa e fundit asfaltike, mbrojtja e skarpatave dhe shpateve nga rënia e gurëve, si dhe rehabilitimi mjedisor. Nga ana tjetër, institucionet sqarojnë se mbyllja e punimeve në këtë segment do të mbarojë në mars të 2024, por nuk jep arsye për zvarritjen e tyre.

“Artikulli me të cilin mora pjesë në konkurs lidhej me inaugurimin dy herë të një rruge të famshme nga ana e qeverisë që është propaganduar shumë. Bëhet fjalë për By pass-in e Vlorës që është një bashkëfinancim me fondet të Bashkimit Europian dhe qeverisë shqiptare.

Duhet theksuar hera-herës që shumë pak e dinë se janë me fonde të Bashkimit Europian këto lloj veprash, sepse propaganda e qeverisë e mbyt këtë të vërtetë. Dy inaugurime verën e kaluar për këtë vepër dhe një vit më pas nga verifikimet rezulton që rruga është e pambaruar, është degraduar edhe investimi miliona euro”, u shpreh gazetarja Esmeralda Topi në fjalën falenderuese për vlerësimin me këtë çmim nga OSBE.

Gazetarja Ilda Hoxha (Koçi) u vlerësua nga prezenca e OSBE për artikullin: “Të gjitha rrugët e Shijakut të çojnë në park, një faturë 40 milionë lekë për parkun që nuk ekziston!”

“Këtë temë e zbulova rastësisht teksa isha për verifikim të një tjetër artikulli. Banorët shprehnin shqetësimin që u ishte premtuar një park, do investohet në një park, ishin hedhur miliona lekë për të, ndërkohë që ai parku nuk ekzistonte.“-rrëfeu Ilda për të pranishmit, pas nderimit me këtë çmim.

Nisur nga shqetësimi i banorëve, premtimi i bërë nga ish-kryebashkiaku i Shijakut, ne vendosëm ta verifikojmë më tej se çfarë kishte ndodhur realisht me këtë park. A ishin hedhur të gjitha lekët për ndërtimin e këtij parku? Faktoje arriti të zbulonte, referuar të gjitha burimeve zyrtare, nëse ishin bërë të gjitha procedurat, nëse ishin hedhur të gjitha paratë, për një park që nuk ekzistonte. Shqetësimi i qytetarëve ishte i drejtë, por në të gjitha rastet zëri tyre kishte rënë në vesh të shurdhët dhe ky ishte një ndër shumë raste që Faktoje i dha zë”, theksoi gazetarja Ilda Hoxha.

Qendra Faktoje, si organizatë e pavarur dhe jo fitimprurëse përbëhet nga një ekip gazetarësh me përvojë, kryesisht në fushën e televizionit. Ndryshe nga mediat tradicionale, Faktoje është edhe një portal që promovon gazetarinë faktverifikuese përmes një metodologjie të unifikuar me organizatat e ngjashme fact-checking në të gjithë globin dhe që nuk ka reklama të bizneseve apo shtetërore.