Nga Linda Fishta

Nëse deri sot keni e keni përdorur panxharin vetëm kur përgatisni sallatë me perime të ziera, apo si salcë pesto për rizoton, po të përgatisni këtë recetë nuk do ta krahasoni me gjë tjetër. Përveç pamjes së bukur që do i japë pjatës, është gjithashtu një depo e vërtetë vlerash ushqyese, si antioksidantë, vitamina etj. 

Përbërësit për 2 persona: ● 500g panxhar i kuq ● 2 qepë të njoma ● 1 mollë jeshile ● 1 patate ● 1/2 litër lëng zarzavatesh ● 80g kos i bardhë ● 50g djathë Gorgonzola ● vaj ulliri ● kripë e piper

Përgatitja: Panxharin e larë e ziejmë në tenxhere me ujë derisa të zbutet. E qërojmë dhe e ndajmë në kubikë. Pataten e qëruar, mollën dhe qepët, të ndara në kubikë, i vëmë të ziejnë në tenxhere me lëngun e zarzavateve duke shtuar këtu edhe copat e panxharit. I lëmë të ziejnë I hedhim më pas në blender dhe i grijmë derisa të jenë bërë si pure. E rregullojmë për kripë e piper. Grijmë tani në blender djathin Gorgonzola e kosin. E shërbejmë supën me salcën e kosit sipër.