"E doja shumë, por bashkëshorti ma ndaloi", Zamira Kita flet për rolin që i ka mbetur peng

Ajo është ndër aktoret më të dashura për publikun shqiptar, emri i të cilës është i lidhur ngushtë jo vetëm me qytetin e Korçës, aty ku u lind e ku vazhdon të japë kontributin e saj artistik prej vitesh, por edhe më gjerë. Rolet e saj kanë lënë gjithnjë gjurmë në historinë filmit dhe teatrit shqiptar, por jo gjithmonë Kita ka patur mundësinë të realizojë atë çfarë ka dëshiruar. Në një intervistë të dhënë së fundmi, për programin “Natën me Aulonën”, aktorja e mirënjohur ka rrëfyer se si bashkëshoti e ka ndaluar të luajë një rol në film, atë të një prostitute, për shkak se nuk e kuptonte forcën karakteriale të tij. 

“Roli që më ka mbetur peng ka qenë ai i një kryeprostitue, pronare e një shtëpie publike. Roli ishte shumë i bukur dhe kishte shumë karakter. Ishte jashtëzakonisht i mirë për mua.

Një rol që mua do të më krijonte mundësi që t'i tregoja publikut se çfarë mund të bëj unë, krijimin e një karakteri. Por ai nuk e kuptonte dot kështu. Sa e lexoi që ishte kryeprostitua tha jo. Nuk do ta bësh këtë film”, -rrëfeu Zamira Kita.