Republika Domenikane 'pushtohet' nga shirat e rrëmbyeshëm, viktima dhe kaos në shumë provinca

Shira të rrëmbyeshëm dhe stuhi që përfshinë fundjavën, kanë krijuar një kaos të vërtetë në Republikën Domenikane, duke shkaktuar deri tani të paktën 21 viktima mes tyre edhe 3 fëmijë. Sipas zyrtarëve mijëra të tjerë janë detyruar të largohen nga banesat dhe të kërkojnë për zona më të sigurta.

Qendra e Operacioneve Emergjente tha se shiu shkaktoi përmbytje masive të shtëpive, ndërprerje të energjisë elektrike, si dhe rrugë e ura të dëmtuara.

Autoritetet vendase bënë me dije se shirat e rrëmbyeshëm pritet të vazhdojnë, ndaj edhe shumica e 32 provincave të vendit mbeten ende nën alarmin e kuq.

Ndërkohë mësimi në shkolla është pezulluar të paktën deri ditën e mërkurë, derisa të bëhet edhe vlerësimi për kushtet se ku do të vijojë mësimdhënia.