Vishuni trashë dhe mos harroni çadrën, ja si do të jetë moti sot

Qielli këtë mëngjes ‘u zgjua’ i pushtuar nga retë, pasi moti i keq dhe temperaturat e ulëta rikthehet sërish në vend këtë të martë. Ndaj mbani parasysh të visheni trashë, çizme të gjata si dhe mos harroni të mbani çadrën gjithmonë me vete.

Sipas Shërbimit Meteorologjik Ushtarak, pothuajse i gjithë territori ynë sot do të përfshihet nga rrebeshe shiu dhe stuhi afatshkurtra, po ashtu edhe dita e mërkurë si dhe pasditja e së enjtes.

Reshjet e dëborës do të jenë prezente në Alpe dhe relievet malore në lindje. Vlen të theksohet elementi i erës si intensiv dhe problematik me drejtim juglindje-jugperëndim 2-9m/s, ndërsa në bregdet e lugina hera herës, era fiton shpejtësi 13-25m/s duke bërë që valëzimi në dete të jetë i forcës 2-5ballë.