Stilistët Etno Vibe në Living

Kur flasim për traditat kombëtare ndjesia është e papërshkrueshme, e sidomos kur bëhet fjalë për ruajtjen dhe promovimin e tyre edhe përtej kufijve.

Patriotizmin e kemi parë të shprehur në disa aspekte, por akoma më emocional bëhet kur elementet tradicionale i shohim në veshje. E ndërsa flitet për modë dhe trende, stilistët tanë kanë arritur t’i ruajnë me fanatizëm, detajet tradicionale shqiptare, duke e njohur botën me Shqipërinë e vogël, të bukur e me vlera plot.

Moda dhe stili janë gjuhë universale, ashtu sikurse etnografia shqiptare me disiplinat e saj, ku në qendër si një mbretëreshë qëndron kostumografia. Arti i komunikimit është në thurjen e çdo jeleku, xhublete, dimije apo rripi të kostumeve shqiptare.

Një kontribut të veçantë në përhapjen e këtyre vlerave brenda dhe jashtë territorit të Shqipërisë mund të përmendim Besë Neziri Rugova, Dorina Kola, Bela Maçin, Katerina Zotaj, Etnik Shalaj etj., stilistë, koleksionet e të cilave janë frymëzuar nga rrënjët dhe elementet ndonjëherë misterioze të kostumografisë dhe etnografisë shqiptare.