Nga Linda Fishta, Fotografia Armand Habazaj

Me uljen e temperaturave bëni eksperimente me perimet që keni në shtëpi, do të jetë gjithmonë e shijshme!

PËRBËRËSIT:
2 lugë gjelle gjalpë, 1 qepë e grirë imët, 1 thelb hudhër, 300g brokoli të pastruar, 1 petë sfoliatë, 200g mocarela, 4 vezë, 300ml qumësht, 1 lugë çaji kripë, ½ lugë çaji piper i zi.

PËRGATITJA:

Nxehim furrën në 175 gradë C.

Në zjarr të ngadaltë shkrijmë gjalpin, shtojmë qepën, hudhrën dhe si të jenë zbutur pak, shtojmë brokolin.
Petën e presim në formë rrethore, dy gisht më të madhe se diametri i tavës. Lyejmë tavën me gjalpë dhe vendosim petën.
Mbi të shtojmë perimet e mësipërme. Në një tas rrahim vezët me qumështin, i shtojmë djathin, kripën e piperin dhe e hedhim
mbi perimet. E pjekim në furrën e nxehtë për 35 minuta derisa të marrë ngjyrë të artë. E lëmë të ftohet për minimum 10 minuta para se ta shërbejmë.