Kushtet jo të mira të motit kanë detyruar autoritetet e porteve detare të shtrëngojnë masat e sigurisë për datat 17, 18 dhe 19 nëntor.

Autoriteti portual i Durrësit ka bërë me dije se linja e tragetit Durrës- Bari dhe anasjelltas, do të pezullohet mbrëmjen e sotme. Ndërsa trageti i linjës Durrës- Ancona do të vijojë lundrimin normalisht.

“Moti i keq; Anulohen përkohësisht lundrimet drejt Barit në datën 17.11.2023. Referuar parashikimeve të Kapitenerisë së Portit të Durrësit mbi situatën hidrometereologjike në Rajonin e Adriatikut, në orët në vijim pritet përkeqësim i motit. Forca e erës do të jetë 20-30 m/s. Dallgëzimi në det të hapur 6-8 bft, me lartësi dallge deri 1.70-3.50 m. Kompanitë e lundrimeve bëjnë të ditur se për pasojë janë pezulluar lundrimet e trageteve mbrëmjen e sotme nga Porti i Durrësit drejt Portit të Barit (Itali) dhe anasjelltas. Ndërkohë trageti i linjës Durrës-Ancona dhe anasjelltas do të vijojë lundrimin normalisht sipas parashikimit”, thuhet në njoftim.

Ndërkohë edhe Drejtoria e Përgjithshme Detare ka njoftuar masat si më poshtë:

1.Është ndaluar dhënia e leje-nisjes gjatë datave 17-18-19.11.2023, duke filluar nga ora 12:00 për të gjitha mjetet e vogla lundruese, anijeve të peshkimit dhe janë njoftuar për marrjen e masave, për sigurinë e tyre.

2.Drejtuesit e mjeteve të vogla lundruese dhe të anijeve të peshkimit janë njoftuar që të kenë në konsideratë kushtet e parashikuara të përkeqësuara dhe marrjen e masave për sigurimin e tyre.

3. Janë njoftuar drejtuesit e anijeve të peshkimit dhe mjetet e vogla lundruese për situatën e përkeqësuar dhe për marrjen e masave për sigurimin e mjeteve në vendet e akostuara dhe parandalimin e ngjarjeve dhe situatave gjatë datave 17-18-19.11.2023

4. Anijet e transportit ndërkombëtar detar për pasagjer dhe automjete NUK do të vazhdojnë të operojnë deri në përmirësimin e kushteve hidrometeorologjike.

5. Përmirësimi i situatës hidrometeorologjike të përkeqësuar  për mjetet e vogla lundruese dhe të peshkimit do të jetë mbas orës 06:00 të datës 19.11.2023”.