Pritet të emocionojë publikun njëlloj si dikur, Elsa Lila jep detajet e para nga koncerti madhështor i datës 1 nëntor

“Finalmente, Elsa” do të jetë koncerti madhështor që këngëtarja shqiptare Elsa Lila do të mbajë më 1 nëntor në Pallatin e Kongreseve. Pas shumë vitesh jashtë Shqipërisë, ikona e këngës së lehtë do të kthehet në vendin ku hodhi hapat e para të karrierës. Në një postim të para pak orëve në Instagram, Elsa ka dhënë disa detaje rreth asaj që pritet të ndodhë së shpejti në kryeqytet.

"Ika me shijen e suksesit të “Evitës” sime në festival, për t’u rikthyer sërish në Tiranë, tani në nëntor. Këtë herë, për herë të parë me një koncert të madh, aty në skenën e Pallatit të Kongreseve, nga ku nisi jeta ime artistike. “Finalmente Elsa” i thotë të gjitha: kohën e gjatë që kam pritur, për të ardhur ky moment; punën e madhe që kam bërë deri më sot, për t’u ndjerë kaq gati, për një koncert si ky, që kërkon jo vetëm përkushtimin por dhe pjekurinë e repertorin e duhur artistik. S’do t’ia dilja dot kurrë vetëm, pa bashkëpunëtorët e miqtë e mi artistë, me të cilët kam krijuar, intepretuar e realizuar në gjithë këto vite, projekte unike, interesante e me muzikë të vërtetë. Këtë do të bëjmë edhe në koncertin e 1 nëntorit, në Tiranë. Ju mirëpres që të më jepni zemrën dhe duartokitjet tuaja, siç keni bërë gjithmonë, ndërsa unë ju kam dhënë zërin e shpirtin tim!"-tregon ajo.