Si e ndryshon shtatzënia trurin e nënës?!

Shtatzënia nuk ndryshon vetëm trupin e një gruaje, por edhe trurin e saj. Sipas studimeve të fundit shkencore, gjatë dhe pas shtatzënisë ndodhin transformime të rëndësishme neurologjike që mund të zgjasin për vite me radhë. Ekspertët theksojnë se i ashtuquajturi “mom brain” apo “truri i nënës” nuk është një dobësim i trurit, por një proces natyral përshtatjeje për kujdesin ndaj fëmijës.

Sipas hulumtimeve të publikuara nga National Geographic, gjatë shtatzënisë ndryshon veçanërisht materia gri e trurit, pjesa që lidhet me kujtesën, emocionet dhe mënyrën si ne përpunojmë informacionin. Shkencëtarët kanë zbuluar se disa zona të trurit “ristrukturohen” për ta bërë nënën më të ndjeshme ndaj emocioneve dhe nevojave të foshnjës.

Një nga ndryshimet më të rëndësishme lidhet me aftësinë për të kuptuar emocionet dhe sinjalet sociale. Truri bëhet më i aftë të dallojë nevojat e foshnjës, të reagojë më shpejt ndaj rrezikut dhe të përqendrohet tek kujdesi ndaj fëmijës. Studiuesit thonë se kjo është arsyeja pse shumë nëna zhvillojnë një intuitë më të fortë pas lindjes.

Shumë gra raportojnë gjatë shtatzënisë ose pas lindjes episode harrese, mungesë përqendrimi apo “brain fog”. Por ekspertët sqarojnë se kjo nuk do të thotë se truri funksionon më keq. Në fakt, ai po ridrejton energjinë dhe prioritetet drejt proceseve emocionale dhe kujdesit prindëror.

Një studim i realizuar me rezonancë magnetike tregoi se ndryshimet në tru fillojnë që në javët e para të shtatzënisë dhe disa prej tyre mbeten të dukshme edhe dy vite pas lindjes. Shkencëtarët besojnë se hormonet si estrogjeni dhe progesteroni luajnë rol kyç në këtë transformim.

Sipas ekspertëve, këto ndryshime mund të kenë edhe efekte pozitive afatgjata. Disa studime sugjerojnë se përvoja e mëmësisë dhe sfidat mendore të kujdesit ndaj fëmijës mund të ndihmojnë në forcimin e aftësive njohëse dhe rezistencës mendore me kalimin e viteve.