Nga Doreada Mio

Ajo më kërkoi vetë të shkruaja për të, gati -gati m’u lut. Nuk e di pse. Mbase ndihet viktimë, mbase ndihet mëkatare. Ajo quhet S dhe nuk ka rëndësi ç’kombësi ka apo ku jeton. Vitet e fundit kanë qenë të trazuara për S. Më kujtohet si na rrëfeu tradhtinë e bashkëshortit, të zbuluar pa shumë mundim, pas shumë dyshimesh nga kontrolli i telefonit.

Kur e shihnim me lotët rrëke edhe për ne “ajo tjetra” ishte një shtrigë e keqe, e paturp dhe ky i shoqi një “ndyrësirë”. Ajo qante dhe ne qamë bashkë me të, duke u lutur mos ishim në vendin e saj, ose të paktën thjesht mos ta dinim. Pas kalvarit të gjatë të divorcit, e diela ishte dita më e keqe për S. Dramë komplet siç thoshte ajo. Ish-bashkëshorti vinte të shihte fëmijët. Fëmijët e paqetë, që s’dinin anën e kujt të mbanin dhe stresoheshin e vuanin. Asaj i kujtoheshin detaje dhe vuante.

Kaluan kohë. Thonë që koha lehtëson shumë dhimbje. S ka një të dashur tjetër, por e diela prapë është dita më e keqe për të. Dramë komplet! I dashuri nuk pranon ta takojë ditën e diel. Ajo tjetra, gruaja e tij, është shumë shtrigë. E ruan në çdo lëvizje dhe i kontrollon telefonin. Nuk e kupton si guxon ai “ndyrësira” t’i thotë mos më shkruaj të dielën. S flet përsëri me lotët rrëke. Këtë herë ne nuk qamë bashkë me të , por përsëri u lutëm të mos ishim në vendin e saj ose të gruas së të dashurit të saj.

S më thotë se psikologu i ka këshilluar të bëjë çfarë e bën të ndihet më mirë , por ajo realisht nuk e di më çfarë e bën të ndihet më mirë. Më sheh në sy dhe më thotë: ‘Mos ia bëj një gruaje tjetër atë që nuk do të doje të ta bënin ty’. Më siguron se i ka dhënë fund kësaj historie që për të është një dashuri e ndaluar, e denjë, për skenar filmi romantik, por unë nuk e besoj dhe jam e bindur as ajo nuk e beson veten. S do të ndihet e dashuruar . Ajo nuk do të flejë vetëm, e ka tmerr të flejë vetëm. E urren të flejë vetëm. Ajo sot feston ditëlindjen e 52-të. Nuk është as mëkatare e as viktimë, as engjëll e as djall. Ajo është njëra nga ne.