Nga: Ani Jaupaj

Kryeredaktore: Santana Çomora

Fotografia: Renato Hyselli

Vendndodhja: Living District – ETC

Gledisi nuk është buçko, por nuk mund të gjente fjalë më të përqendruar për të tërhequr vëmendjen e të gjithë atyre që e njohin lezetin e ushqimit, pavarësisht luftës së një jete me ca kilogramë më tepër. Mirëpo, Gledisi nisi të gatuante njësoj si të gjithë buçkot e kësaj bote, duke qëndruar pas së ëmës dhe gjyshes. As nuk e kujton sa i vogël ka qenë kur grindej me të ëmën për të bërë bashkë me të një pjatë që i hahej edhe vetë. Ato e lejonin, kur mundeshin, por nuk mund ta linin një fëmijë pesë vjeç të tëhollte petë byreku, se nuk arrinte as lartësinë e tavolinës.

Kurioziteti për të mësuar gatimin është rritur bashkë me të. Prandaj nuk e pati të vështirë kur erdhi ora për të zgjedhur mes një shkolle të përgjithshme dhe një profesionale. Ishte vendosur! Do shkonte në Itali për të mësuar kuzhinën. Ç’vend më të shijshëm mund të zgjidhte?!

Megjithatë, në Itali ose jo, gatimi mësohet gjithnjë në tigan, duke punuar. Njësoj si për të gjithë, edhe për Gledisin, përvoja në restorantet italiane ishte shkolla e vërtetë. Megjithatë, bazat i kishte marrë! Prandaj nuk e pati të vështirë të hynte menjëherë në temë. Punoi shtatë vite në Itali, deri sa si çdo e ardhme që nuk mund të parashikojmë, pandemia e ndërpreu punën e gjithë globit, por më shumë se të të tjerëve, preku të parët shërbimet e ushqimit.

Gledisi u gjend i vetëm, në një vend të huaj, pa plane të qarta. Çfarë të bënte? Interneti ishte rruga e vetme që mund ta lidhte, jo vetëm me familjarët, por edhe me të gjithë buçkot që, njësoj si ai e mijëra të tjerë, u duhej të rikrijonin veten për t’ia dalë. Dhe meqenëse as komuniteti i buçkove dhe as ai i llupësve nuk i mungojnë botës virtuale, nuk e pati të vështirë të ishte shumë shpejt në vëmendjen e dashamirësve të tryezës.

Gjuha e thjeshtë, portreti i dashur dhe recetat gjithaq ftuese e të lehta në përgatitje, e bënë më të lehtë zgjerimin e numrave në Instagramin e Gledisit. Fjalët që gjeti për të përshkruar produktet me fjalë popullore krijuan familjaritetin me ndjekësit që po shtoheshin çdo ditë e më shumë. Gledisin nuk e shqetësonte fare gjetja e recetave të reja, realizimi i tyre aq më pak, kështu që edhe me përmirësimin e vetes në punimin e videove, ia doli të bëhej kryefjala e Instagramit, sa i përket gatimit. Dhe si të gjithë, ata që jetojnë jashtë Shqipërisë ça më tepër, në këtë fazë, kur ndjeu e mori një vëmendje që nuk e kishte njohur, Gledisi mendoi të kthehet në Shqipëri. Impenjimin në restorant, me orë të zgjatura në punë e tejlodhje fizike, nuk e donte. Gjeti një rrugë të mesme që të ishte sërish aty, me videot e tij gazmore e të dobishme, por edhe të lidhej me buçkot përmes asaj çfarë gatuan konkretisht, jo vetëm përmes imazhit. Ëmbëlsirat janë rruga më e sigurt! I pëlqejnë të gjithë dhe nuk kanë nevojë për një ekip të tërë.

“Është më e thjeshtë për mua sepse mund t’i realizoj në shtëpi. Restoranti është shumë më i lodhshëm. E nisa këtë praktikë të re përpara festave të fundvitit dhe rezultoi shumë e suksesshme. Njerëzit donin të provonin ato që gatuaja aq sa nuk i përballoja dot të gjitha porositë”- tregon Gledisi.

Sot, ka vendosur dy ditë të caktuara për shpërndarjen e porosive dhe i menaxhon vetë oraret e kohën e tij, të ndarë tashmë mes marketingut dhe ëmbëlsirave. Videot dhe kontakti me ata që e kthyen në pak kohë në një personash të famshëm, vijojnë të jetë prioriteti i planeve të Gledisit, vetëm se tani do t’i realizoj në natyrë, krejt ndryshe nga hapësira e ngushtë që mundohej të sajonte në shtëpinë e tij. Tani për tani do të jetë në Shqipëri, por nuk harron t’i kthejë sytë edhe nga Italia. Kush nuk do t’i kthente?!