Riviera shqiptare ka tërhequr vëmendjen e turistëve anë e kënd botës, e po ashtu tabloidëve të njohur ndërkombëtarë, që shpesh Shqipërinë e rendisin në titujt kryesorë të përmbajtjes së tyre.

Media e njohur franceze “Le Figaro” i ka kushtuar vëmendje alpeve të thepisura shqiptare. Në një reportazh të gjatë për alpet e veriut të vendit thuhet se ato janë kthyer në një El Dorado për pushuesit e huaj, që kanë pasion hiking apo shëtitjet në mal.

"Le Figaro" shkruan se sipërfaqet malore ju lejojnë të eksploroni peizazhe madhështore që kishin mbetur të izoluara për dekada, deri në rënien e regjimit komunist.

Në artikullin e saj gjithashtu veçohen parqet kombëtare të Valbonës dhe Thethit, që tashmë po shijohen nga turistë, jo vetëm nga Europa, por edhe nga Shtetet e Bashkuara.

Veçon “Bjeshkët e Namuna” dhe legjendat që vijojnë të tregohen. Nuk mungojnë edhe krahasimet e peizazhit natyror me veprat e Ismail Kadaresë.

Prestigjozia franceze fton lexuesit ta shijojnë sa më parë këtë mrekulli të natyrës shqiptare, që sipas saj nuk është prekur ende turizmi masiv dhe dora e njeriut, duke theksuar se Shqipëria është një destinacion ideal për pushime me buxhete të vogla dhe për më tepër për një kulinari të veçantë.