Kriza e heshtur e INFERTILITETIT: Pse shumë njerëz vuajnë për vite me radhë mospasjen e një fëmije

Infertiliteti sot prek rreth 1 në 6 persona në mbarë botën, duke e kthyer atë në një nga sfidat më të mëdha shëndetësore të shekullit, por njëkohësisht edhe më të nënvlerësuarat. Pavarësisht se shkalla e këtij problemi po rritet, miliona çifte dhe individë ende nuk kanë akses në diagnostikim apo trajtim, qoftë për arsye financiare, mungesë informacioni apo stigma shoqërore.

Shumë njerëz përballen me vite të tëra stresi emocional, shpenzimesh të mëdha dhe ankthi për shkak të mungesës së mbështetjes mjekësore. Në shumë vende, trajtimet e fertilitetit mbeten të kushtueshme dhe nuk mbulohen nga sigurimet shëndetësore, duke e bërë pothuajse të pamundur për shumë çifte të ndjekin rrugën drejt prindërimit.

Ndërkohë, stigma dhe turpi që shpesh shoqërojnë infertilitetin bëjnë që shumë persona të mos kërkojnë ndihmë, të vonojnë trajtimin ose të mbeten të izoluar emocionalisht. Në realitet, infertiliteti është një çështje mjekësore, jo një dështim personal.

Sot, më shumë se kurrë, është i domosdoshëm normalizimi i bisedës rreth infertilitetit, rritja e aksesit në kujdes shëndetësor cilësor, si dhe mbështetja emocionale për ata që luftojnë për t’u bërë prindër. Të flasim hapur për këtë temë është hapi i parë drejt ndryshimit.

Por kjo nuk do të thotë se një rutinë e keqe e përditshmërisë nuk ndikon në fertilitet dhe ja cilat janë disa prej tyre:

-Gjumë i parregullt ose i pamjaftueshëm

-Ushqyerja e pabalancuar dhe fast food-i i shpeshtë

-Konsumi i tepërt i kafesë, alkoolit ose energjikëve

-Stresi kronik

-Përdorimi i pajisjeve elektronike deri natën vonë

-Mungesa e aktivitetit fizik ose, e kundërta, stërvitja e tepruar

-Ekspozimi ndaj toksinave të përditshme

-Duhanpirja (edhe pasive)

-Pesha e pabalancuar (mbipeshë ose nën peshë)