Dieta për Shëndetin e Planetit ul rrezikun e sëmundjeve kardiovaskulare tek gratë e moshuara; Ja çfarë përmban ajo

Një studim, që zgjati 20 vjet dhe përfshiu më shumë se 65.000 gra pas menopauzës, zbuloi se gratë që ndiqnin më me përpikëri Planetary Health Diet (Dieta për Shëndetin e Planetit) kishin një rrezik dukshëm më të ulët për të zhvilluar sëmundje të zemrës dhe enëve të gjakut. 

Konkretisht, respektimi i kësaj diete u shoqërua me:

ulje të rrezikut për sëmundje kardiovaskulare në përgjithësi;

ulje të rrezikut për sëmundjen koronare të zemrës;

ulje të rrezikut për goditje në tru

ulje të rrezikut për insuficiencë kardiake

Çfarë është Dieta për Shëndetin e Planetit?

Kjo dietë është zhvilluar për të mbrojtur njëkohësisht shëndetin e njerëzve dhe mjedisin. Ajo rekomandon konsum më të madh të:

frutave;

perimeve;

drithërave të plota;

bishtajoreve (fasule, thjerrëza, qiqra);

arrave dhe farave;

yndyrnave me origjinë bimore.

Ndërkohë, rekomandon kufizimin e:

mishit të kuq;

mishit të përpunuar;

ushqimeve me shumë sheqer;

yndyrnave të ngopura dhe ushqimeve shumë të përpunuara.

Si u krye studimi?

Shkencëtarët analizuan të dhënat e grave pas menopauzës për rreth dy dekada. Ata vlerësuan sa afër ishte mënyra e të ushqyerit të secilës grua me rekomandimet e Dietës për Shëndetin e Planetit dhe më pas krahasuan incidencën e sëmundjeve kardiovaskulare gjatë viteve të ndjekjes. 

Rezultatet treguan se gratë që i përmbaheshin më shumë kësaj diete kishin dukshëm më pak gjasa të zhvillonin sëmundje të zemrës dhe enëve të gjakut sesa ato që e ndiqnin më pak. Studiuesit theksojnë se një model ushqyerjeje i pasur me ushqime me bazë bimore mund të jetë një mënyrë efektive për të përmirësuar shëndetin kardiovaskular në moshë të madhe, ndërsa njëkohësisht mbështet edhe qëndrueshmërinë e mjedisit. Megjithatë, duke qenë se studimi është vëzhgues, ai tregon një lidhje mes dietës dhe rrezikut më të ulët, por nuk provon përfundimisht se dieta është shkaku i vetëm i këtij efekti.