Një udhëtim emocional në kulturën artistike shqiptare

Thuhet se një artist i mirë, përmes portretit e bënë po atë personazh të përjetshëm. Artisti të pamundurën e bën të mundur, të paprekshmen të prekshme dhe vdekjen arrin ta përjetësojë. Portreti, falë magjisë së tij, arrin të mbijetojë në skenën e artit bashkëkohor. Ajo që e bën atë kaq magjike është aftësia e tij për të përshkruar jo vetëm karakteristikat fizike, por dhe psikologjike të një figure.

20 portretet e piktores së re, Engji Jaha në ekspozitën e saj të dytë në Prishtinë, e cila do të hap siparin në datën 12 tetor të japin ndjesinë e një kinematografie të vjetër shqiptare; portrete të cilat ndërveprojnë dhe mund të themi se po të ekspozohen të gjitha së bashku, do të duken se kanë një bisedë artistike mes tyre.
Ndryshe nga ekspozita e saj e mëparshme, ku tërhoqën vëmendjen autoportretet, Engji ka vendosur t’ia dedikoj këtë cikël artistik portreteve të artistëve të njohur shqiptar.

“Të pikturosh një portret është sikur të festosh jetën” – shprehet Engji, e cila si një artiste e re ka si qëllim të rikujtojë dhe të nderojë këta personalitete të shquara. Përmes punës së saj, ajo ka arritur të përshkruajë me detaje karakteret dhe personalitetet e tyre, duke i bërë ato që të jenë jo vetëm pamje, por edhe reflektim i thellësive të shpirtit dhe vlerave të tyre në shoqërinë shqiptare.

Me këtë ekspozitë të dytë personale, Engji po jep një kontribut në kujdesjen e trashëgimisë artistike shqiptare, duke i rikujtuar publikut figurat më me peshë mendimi e që kanë bërë histori në fushën e artit dhe kulturës. Ekspozita e saj është një udhëtim emocional dhe estetik në kulturën artistike shqiptare, duke i shndërruar portretet klasike, më të modernizuara e në të njëjtën kohë duke shfaqur natyrën ekspresive dhe të guximshme të saj.

engji jaha

tinka kurti

dritero agolli

motra tone