Ornela Vorpsi në një rrëfim për familjen ''Nuk dua të kem njerëz të shtirur pranë vetes, ja pse nuk flas më me motrën"

Prej disa ditësh, Ornela Vorpsi është kthyer në personazhin më të diskutuar në media dhe rrjetet sociale. Rikthimi në Tiranë, aty ku dhe mori mësimet e para në Akademinë e Arteve të Bukura, me rastin e çeljes së ekspozitës ‘’Providence’’ ku shfaqet për herë të parë përpara publikut shqiptar me një seri pikturash, vizatimesh e fotografish, nuk ka kaluar pa shkaktuar zhurmë. Artistja kontraversiale, e cila jeton prej disa vitesh në Paris, ka habitur të gjithë me  deklaratat për dashurinë platonike që ka ndjerë për kryeministrin Rama gjatë kohës që ky i fundit ishte profesor i saj, apo me vështirësitë me të cilat është përballur pas burgosjes së babait. Por, në një intervistë të dhënë mbrëmë për ‘’Opinion” Ornela është ndalur më gjatë tek rrëfimet për familjen. E pyetur nga Fevziu se cila ishte marrëdhënia e saj me të motrën Laura Vorpsi, ish-zëdhënëse e Partisë Demokratike, Ornela u përgjigj: ‘’ “Për momentin i kam prerë raportet me motrën time sepse kemi etika të ndryshime, dëshira të ndryshme dhe ndjej që nuk kemi se çfarë të ndajmë me njëra-tjetrën. Unë kam nevojë për shkëmbim të thellë dhe të vërtetë, kur nuk e kam, nuk më intereson më njeriu. Jo nuk kam më raporte”,-përfundoi ajo. Hera e fundit që motrat janë parë bashkë ka qenë gjatë verës së 2015-ës.