Nga arti i kuzhinës në pasarelat e Fashion Week; Një tjetër sukses i Silvana Musej

Kudo ku ajo është prezente, sharmi dhe eleganca do të jenë në kulmin e tyre. E kemi fjalën për shefen e famshme shqiptare, të kuzhinës italiane, Silvana Musej. Sigurisht që fjalët janë të pakta për punën e saj, krahasuar me përkushtimin e shumë viteve, falë të cilës ia ka dalë të jetë një grua e fortë dhe e pavarur në çdo aspekt të jetës.

Dhe kur themi në çdo aspekt, Silvana përveçse një shefe e suksesshme në punën e saj, një nënë shembullore në përditshmëri, nuk lë pas dhe atë që në fakt çdo grua duhet ta ketë. Pasionin për të bukurën!

Si e tillë, vetëm pak javë më parë Silvana Musej ishte e ftuara e veçantë e stilistes Margerita Kola në eventin e rëndësishëm të botës së modës, GX Fashion Week, 'Javën e Modës në Milano' dhe jo pa qëllim. Kola krijon koleksione unike të veshjeve, kushtuar grave të forta dhe të suksesshme, ashtu siç Silvana ndër vite ia ka dalë duke kapërcyer hendeqe vështirësish, që dashur padashur t’i sjell diaspora.

GX Fashion Week, është një event madhështor i organizuar nga presidentja e APS Showteam, Gentiana Dervishi, një tjetër shqiptare e suksesshme përtej kufijve.