Akullore me pjeshkë dhe kos grek, ideale për ditët e nxehta të verës

Në ditët e nxehta të verës, një akullore e bërë në shtëpi është zgjedhja perfekte për të ëmbëlsuar momentet pa u rënduar. Një recetë e thjeshtë, me pak përbërës dhe pa pana, sjell një kombinim perfekt mes shijes së ëmbël të pjeshkës dhe kremozitetit të kosit grek.

Kjo akullore është ideale për ata që kërkojnë një alternativë më të lehtë ndaj akulloreve tradicionale, por pa hequr dorë nga tekstura kremoze dhe shija e frutave të freskëta.

Përbërësit:
500 gramë pjeshkë të pjekura
300 gramë kos grek
Pak mjaltë ose ëmbëlsues sipas dëshirës (opsionale)
Disa pika lëng limoni për një shije më të freskët
Përgatitja:
Fillimisht lani, qëroni dhe prisni pjeshkët në copa të vogla. Vendosini në ngrirje për disa orë, derisa të ngrijnë plotësisht.

Më pas, kalojini pjeshkët e ngrira në blender dhe shtoni kosin grek. Përziejini derisa të krijohet një masë homogjene dhe kremoze.

Nëse dëshironi një shije më të ëmbël, mund të shtoni pak mjaltë. Për një aromë më freskuese, disa pika limoni.

Masën e përgatitur vendoseni në një enë dhe lëreni në frigorifer për disa orë derisa të marrë konsistencën e akullores.

Para servirjes, nxirreni për disa minuta në temperaturën e dhomës, në mënyrë që të bëhet më e butë dhe kremoze.